တွၼ်ႈတႃႇတေ ဢုပ်ႇဢူဝ်း တင်းၵၢၼ်သိုၵ်း ၸုမ်းလွတ်ႈလႅဝ်း သဝ်းၶေႃၶၢင် (KIO)လႄႈ ၸုမ်းတၢင်တူဝ် ၽၢႆႇၵၢၼ်သိုၵ်း လူင်ပွင်ႈၸိုင်ႈ တႃႇတေ ႁူပ်ႉထူပ်း လိူၵ်ႈဢွင်ႈတီႈလႄႈ ဝၼ်းထီႉမၼ်း ၽွမ်ႉၸႂ်ၵၼ် ပႆႇလႆႈ တိုၵ်ႉငူပ်ႉငီႉ ၵၼ်ယူႇၼႆ ၽူႈႁဵတ်းသၢင်ႈ လွင်ႈငမ်းယဵၼ် လုင်းသၢၼ်ႉဢွင်ႇ လၢတ်ႈ။

မိူဝ်ႈလိူၼ်ၵျႃႇလၢႆႇ ၼႂ်းဝူင်ႈၼႃႈ ပွၵ်ႈဢွၼ်တၢင်းၼၼ်ႉ ယွၼ်ႉၵၢၼ်သိုၵ်း ၶဵင်ႈၶႅင်တေႃႇၵၼ် တင်းသွင်ၽၢႆႇလႄႈ ၸုမ်းKIO (ဒု-ၸိတ်ႉဢူးၸီးၶျႃပ်) ၵႅမ်ၸွမ်ႁၢၼ် ၵွၼ်ႇမေႃႇ တင်းၵႅမ်ႁူဝ်ပဝ်ႈ ၽၢႆႇၵႅတ်ႇၶႄႇ သၢင်ႈလွင်ႈငမ်းယဵၼ် မိူင်းႁူမ်တုမ် ၵႅမ်ၸွမ်ႁၢၼ် ၸူဝ်းဝိၼ်း ပိူဝ်ႈတႃႇတေ ႁူပ်ႉထူပ်းၵၼ် မီးလွင်ႈငူပ်ႉငီႉ ၽႅၼ်ၵၢၼ်ဝႆႉသေတႃႉၵေႃႈ ယင်းပႆႇလႆႈ လွင်ႈတၢင်း ၽွမ်ႉၸႂ်ၵၼ်ၼႆ။

လုင်းသၢၼ်ႉဢွင်ႇ လၢတ်ႈဝႃႈ“ၼႂ်းလိူၼ်ၵျႃႇလၢႆႇၼႆႉ လူင်ပွင်ၸိုင်ႈ ဢမ်ႇမီးၶၢဝ်းယၢမ်းတၼ်း တေႃႇထိုင် ဝၼ်းထီႉ8၊ ဢွင်ႈတီႈၵေႃႈ ပႆႇလႆႈမၵ်းမၼ်ႈ တေပဵၼ်ဝၢႆးလင် ဝၼ်းထီႉ 9ၼႆ၊ ၽၢႆႇKIOတႄႉ တေပဵၼ်ၸၼ်ႉ ၸွမ်သိုၵ်း ၵေႃႉတေၵႂႃႇၶိုၼ်ႈ၊ တီႈတေဢုပ်ႇဢူဝ်းၼႆႉ လူင်ပွင်ၸိုင်ႈ ၶႂ်ႈႁဵတ်းတီႈဝၢၼ်ႈမေႃႇ (မၢၼ်ႈမူဝ်ႇ) ၵူၺ်းၼႃႇKIO ၶဝ်ဢမ်ၽွမ်ႉလႆႈၸႂ်၊ လူင်ပွင်ၸိုင်ႈ ၶိုၼ်းလၢတ်ႈမႃးထႅင်ႈဝႃႈ ႁဵတ်းတီႈ ဝၢၼ်ႈမေႃႇလႆႈယဝ်ႉၼႆ တေႃႇထိုင်မိူဝ်ႈလဵဝ် KIO ၶဝ် ပႆႇတွပ်ႇသင်ၶိုၼ်း” လၢတ်ႈၼင်ႇၼႆ။

ၽၢႆႇလူင်ပွင်ၸိုင်ႈ ၶဝ်တႄႉ တွၼ်ႈတႃႇ တေႁူပ်ႉထူပ်း လူၺ်ႈတၢင်းၵၢၼ်သိုၵ်း သွင်ၽၢႆႇၼၼ်ႉ တီႈမိူင်းၶၢင် ၸႄႈဝဵင်းဝၢၼ်ႈမေႃႇ ဢမ်ႇၼၼ် မိူင်းတႆးပွတ်းႁွင်ႇ ၸႄႈဝဵင်းမူႇၸႄႊ၊ ၵူၺ်းၼႃႇၽၢႆႇ KIO ဢမ်ႇႁပ်ႉၶၢမ်ႇ၊ ၶိုၼ်းတၢင်ႇထိုင်ဝႃႈ တီႈၼႄႇၸၢပ်ႈ မိူင်းၶႄႇ ၸႄႈဝဵင်း မိူင်းမွၵ်ႇ ၼႂ်းၵႄႈလွႆ ၸႄႈတင်းမၢႆႇၵျႃႇယၢၼ်ႇ မီးဝၢၼ်ႈ ပရၼ်ႇငူၼ်ႇတၢင်ႇ ဝႆႉၼင်ႇၼႆ။ တေႃႇထိုင်ယၢမ်းမိူဝ်ႈလဵဝ် တွၼ်ႈတႃႇတေ ႁူပ်ႉထူပ်းၵၼ် ယင်းပႆႇလႆႈမၵ်းမၼ်ႈ ဢွင်ႈတီႈလႄႈ ဝၼ်းထီႉမၼ်းၼႆ။

KIO ၶဝ်ၶိုၼ်းလၢတ်ႈဝႃႈ တေႃႈလဵဝ် ၵၢၼ်သိုၵ်း တိုၵ်ႉၶဵင်ႈၶႅင်ႁႅင်းယူႇ ပိူဝ်ႈတႃႇတေ ႁူပ်ႉထူပ်းဢုပ်ႇဢူဝ်းၵၼ်တီႈ ၸႄႈဝဵင်း ဝၢၼ်ႈမေႃႇတႄႉ တေဢမ်ႇပေႃးၶႅမ်ႉလႅပ်ႈ၊ ၽၢႆႇလူင်ပွင်ၸိုင်ႈ သမ်ႉတွပ်ႇၶိုၼ်းဝႃႈ တေႁဵတ်းတီႈ ဝၢၼ်ႈမေႃႇယူႇ တိၵ်းတိၵ်း လၢတ်ႈၸိူင်ႉၼႆ။
KIO ၶဝ် တႄႇမိူဝ်ႈ 1994 လႆႈႁဵတ်း လွင်ႈၽွမ်ႉၸႂ် လူင်းလၢႆးမိုဝ်း ၵိုတ်းယိုဝ်းၵၼ်တင်း လူင်ပွင်ၸိုင်ႈယဝ်ႉလႄႈ တေဢမ်ႇႁဵတ်းလွင်ႈ လူင်းလၢႆးမိုဝ်း ၵိုတ်းယိုဝ်းထႅင်ႈ ပွၵ်ႈၼိုင်ႈ၊ တေဢဝ် တၢင်းၵၢၼ်မိူင်းသေ သိုပ်ႇဢုပ်ႇဢူဝ်း ၵၼ်ၵႂႃႇ ယွၼ်းထိုင် ၼင်ႇၼႆ။