ၵူၼ်းဝၢၼ်ႈ ၵူၼ်းသူၼ် ၸိူဝ်းယူႇပွတ်း မိူင်းဢွတ်ႇ၊ ၶူဝ်ယၢဝ်း ၸႄႈဝဵင်းမိူင်းသူႈ ၊ မိူင်းတႆး ပွတ်းႁွင်ႇၶဝ် တင်ႈတႄႇ ပႃႇတီႇ မႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA လႄႈ တပ်ႉသိုၵ်း လူင်ပွင်ၸိုင်ႈ ပဵၼ်ပၢင်တိုၵ်း ၵၼ်မႃး မိူဝ်ႈပူၼ်ႉမႃး လၢႆဝၼ်းၼၼ်ႉ လႆႈထုၵ်ႇ တပ်ႉသိုၵ်း လူင်ပွင်ၸိုင်ႈ ပႄႉၵိၼ် တဵၵ်းတဵင်သေ ဢမ်ႇၵႃး ၶူဝ်းၶွင် ႁိူၼ်းယေးၵေႃႈ လႆႈထုၵ်ႇၾႆးၽဝ် ၸွမ်းၼႆ လႅင်ႇၶၢဝ်ႇ ပိုၼ်ႉတီႈလၢတ်ႈ။

တပ်ႉသိုၵ်း လူင်ပွင်ၸိုင်ႈၼႆႉ တႄႇဝၼ်းထိႉ 20-6-2012 ထိုင် ဝၼ်းထီႉ 3-7-2012 လႆႈဢဝ် မၢၵ်ႇလူင် 120MM ပွႆႇသႂ်ႇ ၼႂ်းဝၢၼ်ႈ ၶူဝ်ယၢဝ်းလႄႈ ႁိူၼ်းၵူၼ်းဝၢၼ်ႈ (7) လင် လႆႈလူႉလႅဝ် ၵႂႃႇ။ ၵူၼ်းဝၢၼ်ႈၸိုဝ်ႈ ၸၢႆးၸၢႆး (ဢမ်ႇၸႂ်ႈၸိုဝ်ႈတႄႉ) ဢႃႇယူႉ (50) ၵေႃႉၼိုင်ႈ လႆႈထုၵ်ႇ မၢၵ်ႇတိူဝ်ႉသေ တၢႆ၊ ၼၢင်းယိင်း ဢမ်ႇႁူႉၸိုဝ်ႈ ဢႃႉယူႇ (45) ၵေႃႉၼိုင်ႈၵေႃႈ လႆႈၸဵပ်းမၢတ်ႇ ယွၼ်ႉမၢၵ်ႇလူင်။

မိူၼ်ၼင်ႇၼၼ် ဝၢၼ်ႈၼွင်ၵၢဝ်ႇ၊ ၼွင််ယူးၵေႃႈ လႆႈထုၵ်ႇ မၢၵ်ႇတူၵ်းသႂ်ႇလႄႈ ႁိူၼ်းၵူၼ်းဝၢၼ်ႈ (3) လင်လႄႈ ၶူဝ်းႁိူၼ်းတင်းၼမ် လႆႈလူႉလႅဝ် သေဢမ်ႇၵႃး ဝူဝ်းၵႂၢႆးၵေႃႈ လႆႈတိူဝ်ႉမၢတ်ႇ တၢႆၸွမ်းတင်းၼမ် ၼႆယဝ်ႉ။

“ဢဝ်မၢၵ်ႇ ပွႆႈသႂ်ႇယဝ်ႉ ဢမ်ႇၵႃး တူဝ်ၶဝ်ၵေႃႈ ၵႂႃႇယႃႉပႃးသေ ႁိမ်ဢဝ် ၶူဝ်းၶွင် ႁိူၼ်းယေး၊ မူၵႆႇ ဝူဝ်းၵႂၢႆးပိူၼ်ႈ ၊ ငိုၼ်းၶမ်းပိူၼ်ႈၸွမ်း” ၼႆ လႅင်ႇၶၢဝ်ႇ သိုပ်ႇလၢတ်ႈ ၼင်ႇၼႆ။

မၼ်းလၢတ်ႈဝႃႈ မိူဝ်ႈဝၼ်းထီႉ(6/7/8/-7-2012) ၼၼ်ႉ သိုၵ်းမၢၼ်ႈ ဢၼ်ပၵ်းသဝ်း တီႈ(7)လၵ်း ဢိူင်ႇမိူင်းၵၢဝ် ၸႄႈဝဵင်း တၢင်ႉယၢၼ်းၼၼ်ႉ ၵႂႃႇယႃႉႁိူၼ်း ၵူၼ်းဝၢၼ်ႈၶဝ် တႃႇ7 လင်သေ ဢဝ်မိူဝ်းႁဵတ်း တီႈယူႇသဝ်းၶဝ် တီတပ်ႉ(7)လၵ်း၊ လိူဝ်သေၼၼ်ႉ သိုပ်ႇၵႂႃႇတီႈ ဝၢၼ်ႈႁူၺ်ႈလူင် သေ ၸုတ်ႇထဵင်ႁႆႈ ၵူၼ်းဝၼ်ႈ(1) လင်၊ ယႃႉႁူဝ်ႉႁႆႈ ပွႆႇဝူဝ်း ၵႂၢႆးၶဝ်ႈၵိၼ်(3) တိူၵ်ႇ၊ ဢဝ်ၶဝ်ႈသၢၼ်ၵႂႃႇ (5) ထူင်၊ မူ 1 တူဝ်၊ ၵႆႇ20တူဝ် လႄႈငိုၼ်း 245000 ပျႃး။

မိူဝ်ႈဝၼ်းထီႉ 2-7-2012 ၼၼ်ႉၵေႃႈ တပ်ႉသိုၵ်းမၢၼ်ႈ ၶလယ (136) မိူင်းပၢတ်ႇ ၵႂႃႇၸုတ်ႇၽဝ် ထဵင်ႇႁႆႈ ၵူၼ်းဝၼ်ႈ (5)လင် လႄႈ ဢဝ်ငိုၼ်း 341000 ပျႃး။ ၼႂ်းဝၼ်းလဵဝ်ၵၼ် တပ်ႉ ၶလယ (136) မိူင်းပၢတ်ႇၼင်ႇၵဝ်ႇ ၵႂႃႇတီႈဝၢၼ်ႈ ၶူဝ်ယၢဝ်း သေယႃႉႁူဝ်ႉ ဝူဝ်းၵႂၢႆးသေ ပွႆႈဝူဝ်းၵႂၢႆး ၶဝ်ႈၵိၼ် ၶဝ်ႈၵူၼ်းဝၢၼ်ႈ (1) တိူၵ်ႇ၊ ဢဝ်လၢႆတူဝ်ငိုၼ်း (160000)ပျႃး။

“သိုၵ်းမၢၼ်ႈ ၼႆႉဝၢႆးသေ ပဵၼ်ပၢင်တိုၵ်းၵၼ် တင်း တပ်ႉသိုၵ်းတႆးယဝ်ႉ ၶဝ်ဢမ်ႇႁူၼ်ၶိုၼ်းသေ ႁဵတ်းတပ်ႉ ပၵ်းသဝ်းယူႇ ၼႂ်းထိူၼ်ႇ ၼႂ်းတူင်ႈ ၊ ပေႃႈႁၼ် မႅၼ်ႈ ၵူၼ်းၵႂႃႇမႃးၵေႃႈ တိၺွပ်းသေ ႁႂ်ႈဢဝ် ၶဝ်ႈၼမ်ႉ တၢင်းၵိၼ် ၵႂႃႇလႅၵ်ႈ” လႅင်ႇၶၢဝ်ႇလၢတ်ႈ။

မိူဝ်ႈဝၼ်းထီႉ 2-7-2012 ၼၼ်ႉ ၵူၼ်းဝၢၼ်ႈ 2 ၵေႃႉ ၽႃႇၺႃး တပ်ႉသိုၵ်း ဢၼ်ပၵ်းသဝ်းတီႈ 7 သေ ထုၵ်ႇတိၺွပ်းၵႂႃႇ၊ ၵေႃႉၼိုင်ႈတႄႉ လွတ်ႈမႃးသေ ၵေႃႉၼိုင်ႈ တိုၵ်ႉထုၵ်ႇၵုမ်းၶင်ဝႆႉ၊ ပေႃးၶႂ်ႈလႆႈၼႆ တေလႆႈဢဝ် ၶဝ်ႈၼမ်ႉ တၢင်းၵိၼ်ၵႂႃႇလႅၵ်ႈ ၼႆယဝ်ႉ။

မိူဝ်ႈတပ်ႉသိုၵ်း လူင်ပွင်ၸိုင်ႈမၢၼ်ႈ ဢဵၼ်ႁႅင်း မွၵ်ႈ 12 တပ်ႉၵွင် တိုၵ်ႉတူင်ႉၼိုင် ၵႂႃႇမႃး ၼိူဝ်တၢင်းၵႃး မိူင်းၵၢဝ်-မိူင်းသူႈလႄႈ ၵူၼ်းဝၢၼ်ႈ ႁူၺ်ႈလွတ်ႇ၊ ၶူဝ်ယၢဝ်း၊ တွင်ႁဵဝ်း၊ ႁူၼ်ႈလူင်၊ (7) လၵ်း ၶဝ်ၵေႃႈ တိုၵ်ႉၵူဝ်ႁေသေ လႆႈပၢႆႈမႅပ်းယူႇဝႆႉ ၼႂ်းထိူၼ်ႇယူႇ ၵူၼ်းၼႂ်း ပိုၼ်ႉတီႈ ပွင်ႇၶၢဝ်ႇမႃး ၼင်ႇၼႆ။