ၸုမ်းလွတ်ႈလႅဝ်းသဝ်းၶေႃၶၢင် KIO လႄး တပ်ႉသိုၵ်းလူင်ပွင်ၸိုင်ႈ ပဵၼ်ပၢင်တိုၵ်းၵၼ် မိူင်းၶၢင် ၼႂ်းဝဵင်းၽႃၵၢၼ်ႉ ဝၼ်းထီႉ 13-09-12 တေပဵၼ်ယၢမ်းႁူဝ်ၶမ်ႈ 4 မူင်းတေႃႇထိုင် 8 မူင်းပၢႆၵၢင်ၶမ်ႈ ၼႆလႆႈႁူႉၸွမ်းတီႈ www.thithtoolwin.com။

တပ်ႉသိုၵ်းလူင်ပွင်ၸိုင်ႈ ၽၢႆႇတႂ်ႈတပ်ႉၸုမ်းလူင်33 လႄႈ တပ်ႉၵွင် 6 ၽၢႆႇတႂ်ႈတပ်ႉၸုမ်း 2 ၸုမ်းလွတ်ႈလႅဝ်းသဝ်းၶေႃၶၢင် KIO လႆႈပဵၼ် ပၢင်တိုၵ်းၵၼ် ၼႂ်းဝဵင်းၽႃၵၢၼ်ႉ ၽွင်းယၢမ်းလုၵ်ႈဢွၼ်ႇႁဵၼ်းၶဝ် လူင်းႁူင်းႁဵၼ်းယူႇ ၵူၼ်းပိုၼ်ႉတီႈ လၢတ်ႈၼင်ႇၼႆ။

“ပဵၼ်ပၢင်တိုၵ်းၼႂ်းဝဵင်း ယၢမ်းလုၵ်ႈၸၢႆးၶႃႈ လူင်းႁူင်းႁဵၼ်း 4 မူင်းႁူဝ်ၶမ်ႈၼႆႉဢေႃႈ၊ ပဵၼ်တီႈမေႃႇဝၼ်းဢေႃႈ ၊တေႃႇထိုင်မိူဝ်ႈလဵဝ် တိုၵ်ႉတိုၵ်းၵၼ်ယူႇ ပဵၼ်ၵမ်း ၊ မိူဝ်ႈ 4 မူင်းပႆႇမီးလီ ၶႃႈတိုၵ်ႉၼင်ႈပႂ်ႉ လုၵ်ႈၶႃႈတီႈသႅင်ႇ ၼမ်ႉၼဵင်ႈဝၢၼ်ၼၼ်ႉယူႇ၊ လုၵ်ႉတီႈၼိူဝ်ၼၼ်ႉသေ တေယိုဝ်း ၶႃႈၵေႃႈလႆႈလႅၼ်ႈပၢႆႈမႃး၊ တင်းၼႆႉၵေႃႈယိုဝ်း တင်းပုၼ်ႉၵေႃႈယိုဝ်း ၶိူင်ႈလူင်ၵေႃႈယိုဝ်းပႃးထႅင်ႈ၊ ၼႂ်းဝဵင်းၵေႃႈ တူၵ်းသႂ်ႇပႃးဢိတ်းဢိတ်း ၵွၼ်ႇၶႃႈဢေႃႈ၊ ယွၼ်ႉယိုဝ်းၶဝ်ႈၼႂ်းဝဵင်း တိုၵ်းၵၼ်ၼႂ်းဝဵင်းလႄႈ ၵူၼ်းၵေႃႈ ဢွၼ်ၵၼ် သုၵ်ႉသုၵ်ႉသၵ်ႉသၵ်ႉယူႇ၊ ပၢင်တိုၵ်းၼႆႉ တၢင်ႇတီႈတႄႉ ပဵၼ်ယူႇတႃႇသေယဝ်ႉ”ဝႃႈၼႆ။

ၵူၼ်းပိုၼ်ႉတီႈ ၵေႃႉၼၼ်ႉသိုပ်ႇလၢတ်ႈၼႄ ထႅင်ႈဝႃႈ” မိူဝ်ႈဝႃႈၵၢင်ၶမ်ႈ ၽူၼ်တူၵ်းတင်းၶမ်ႈယဝ်ႉၶႃႈ၊ ၽူၼ်တူၵ်းယူႇၵေႃႈ ၵူၼ်းပၢႆႈတင်းၼမ်ယဝ်ႉ၊ မီးမွၵ်ႈဢၢၼ်ႇႁူဝ်ႁဵင်မၼ်းၶႃႈ၊ ၶိုၼ်ႈမႃးၸူးတီႈ ဢၼ်ႁဝ်းလိုဝ်ႈသဝ်းၼႆႉ တၢင်းမူတ်းၶႃႈ၊ ဢွၼ်ၵၼ်လႅၼ်ႈမႃး ပေႃးသုၼ်ႈသိၼ်းသၢၼ် မၢင်ၵေႃႉၶီႇလိုၵ်း ႁူဝ်ၶဝ်ႇတႅၵ်ႇ ပေႃးသုၵ်ႉသၵ်ႉလူင်ဝႆႉ၊ တီႈပၢင်သဝ်း ဢၼ်ႁဝ်းယူႇၼႆႉ မီႈၵူၼ်းပၢႆႈၽေး ၼပ်ႉႁူဝ်ႁဵင်မၼ်းယဝ်ႉ၊ တီႈၵွင်းမူးႁူဝ်ဝဵင်းၼၼ်ႉ ၵူၼ်းပၢႆႈၽေးပၢင်တိုၵ်းၼမ်လိူဝ်သေ ၵူၼ်းပၢႆႈၽေးၼမ်ႉ၊ ၼိူဝ်ၵျွင်း တႂ်ႈၵျွင်း ဝၢင်းၵျွင်းၽြႃး တဵမ်ၵႂႃႇမူတ်း ယွၼ်ႉၽူၼ်မႃးလႄႈ မီးတင်းယၢပ်ႇၽိူတ်ႇ ဢမ်ႇမီးတီႈယူႇ တီႈသဝ်း”ဝႃႈၼႆ။

ဢၼ်ၼႆႉပဵၼ်ငဝ်းလၢႆး မိူဝ်ႈၽွင်းယၢမ်း ပၢင်တိုၵ်းၼႂ်းဝဵင်းၽႃၵၢၼ်ႉ တေႃႇထိုင် 8 မူင်းပၢႆႇ။
တႄႇၵၢင်လိူၼ် August ပူၼ်ႉမႃးၼႆႉလႆႈပဵၼ်ပၢင်တိုၵ်းၵၼ် တီႈၸိူဝ်းမေႃႇသႅင်ႇၶဵဝ် ၽႃၵၢၼ်ႉ  သေ တေႃႇပေႃးထိုင် ယဵၼ်းပဵၼ်ပၢင်တိုၵ်းၼႂ်းဝဵင်းမႃး၊ တပ်ႉသိုၵ်းလူင်ပွင်ၸိုင်ႈလႄႈ KIO ပဵၼ်ပၢင်တိုၵ်းၵၼ် ၼႂ်းမိူင်းၶၢင် မီးပီႊပၢႆယူႇယဝ်ႉ၊ လႆႈႁူႉၸွမ်းပႃးဝႃႈ ၽွင်းယၢမ်းၼႆႉ ၼႂ်းၸေႈဝဵင်းၽႃၵၢၼ်ႉ ယွၼ်ႉၼမ်ႉၼွင်း သေ ၶူဝ်ၸိူၵ်ႈ လႄႈပၢင်သိုဝ်ႉၶၢႆသႅင် (ၵျွၵ်ႉဝၢႆး) ၵမ်ႈၽွင်ႈ ၼမ်ႉထူမ်ႈယူႇၼႆယဝ်ႉ။