တပ်ႉသိုၵ်း လူင်ပွင်ၸိုင်ႈမၢၼ်ႈ ဢၼ်ပၵ်ႈသဝ်းယူႇတီႈ တိင်ႇၵႃႉယၢၼ်ႊ (Dingga Yang) ယၢၼ်ၵႆၵၼ်တင်း တေႃႉၽူင်းယၢၼ်ႊ မွၵ်ႈ 3 လၵ်း ၸေႊတွၼ်ႈ မၢၼ်ႈမေႃႈ တီႈ ၸေႊမိူင်းၶၢင် လႆႈပဵၼ်ပၢင်တိုၵ်းၵၼ် တင်း တပ်ႉသိုၵ်း လွတ်ႈလႅဝ်းသဝ်းၶေႃၶၢင် (KIA) သေၼႂ်းပၢင်တိုၵ်းၼၼ်ႉ သိုၵ်းမၢၼ်ႈ လႆႈတၢႆ 3ၵေႃႉ မၢတ်ႇၸဵပ်း 6 ၵေႃႉၼႆ ၽူႈမီးၸၼ်ႉ ၼႃႈသိုၵ်းၵေႃႉၼိုင်ႈ လၢတ်ႈၼႄ။

တပ်ႉသိုၵ်းမၢၼ်ႈ ၶလယ (142)မီးႁႅင်းမွၵ်ႈ 20 ပၢႆ ဢၼ်ပၵ်းသဝ်းယူႇတီႈ တိၼ်ႇၵႃႇယၢၼ်ႊ ထုၵ်ႇတပ်ႉၵွင် (24) ၽၢႆႇတႂ်ႈတပ်ႉၸုမ်း (5) KIA  ဢဝ်မၢၵ်ႇႁၢင်ႈသေ တိုၵ်းတေႃး လႄႈလႆႈတၢႆမၢတ်ႇၵႂႃႇ ၼႆယဝ်ႉ။

ၵူၼ်းပိုတ်ႉတီႈ ဢၼ်လႆႈႁူႉႁၼ်ၸွမ်း ၵေႃႉၼိုင်ႈလၢတ်ႈဝႃႈ ယၢမ်းလဵဝ် တပ်ႉသိုၵ်းမၢၼ်ႈ ဢၼ်လႆႈမၢတ်ႇၸဵပ်းၼၼ်ႉ ၵႂႃႇသူင်ႇႁူင်းယႃတီႈ တေႃႉၽူင်းယၢၼ်ႊ ဝႃႈၼင်ႇၼႆ။

မိူဝ်ႈဝၼ်းထီႉ 16 လိူၼ် September ယၢမ်းၶမ်ႈၼၼ်ႉ တပ်ႉသိုၵ်းမၢၼ်ႈ ၽိူမ်ႉႁႅင်းသိုၵ်းထႅင်ႈလူတ်ႉ 4 လမ်း မႃးတၢင်း တပ်ႉၶမယ (438)ဢၼ်ပၵ်းသဝ်းယူႇတီႈ ဝၢၼ်ႈ ၼုမ်ႇလၢၼ်ႊ (Num Lang) ၼႆ ၽူႈမီးၸၼ်ႉ KIO လၢတ်ႈၼႄ။

မိူဝ်ႈဝၼ်းထီႉ 17-09-2012 ယၢမ်းၵၢင်ၼႂ် 10 မူင်းၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ ၶလယ(142) ဢဝ်ၶိူင်ႈလူင် (81 MM) လႄႈ(105 MM) ပိုတ်းယိုဝ်းၸူးတပ်ႉၸုမ်း(5) KIA ဢၼ်ပၵ်းသဝ်းယူႇတီႈ ၼႂ်းပိုၼ်ႉတီႈ တေႃႉၽူင်းယၢၼ်ႊ သေယွၼ်ႉ မၢၵ်ႇၶိူင်ႈလူင်ၼၼ်ႉ တူၵ်းသႂ်ႇလႄႈ တႅဝ်းႁူမ်ႈ တီႇမူဝ်ႇၶရႅတ်ႉတိၵ်ႉ လုၵ်ႈႁဵၼ်းမိူင်းမၢၼ်ႈ ပတ်ႉပိုၼ်ႉ (ABSDF) လႆႈတၢႆၵႂႃႇ ၵေႃႉၼိုင်ႈၼႆ ၽူႈမီးပုၼ်ႈၽွၼ်း ၼႃႈသိုၵ်း KIA ၵေႃႉၼိုင်ႈလၢတ်ႈၼင်ႇၼႆ။

ၼႂ်းၵႄႈတပ်ႉသိုၵ်း လူင်ပွင်ၸိုင်ႈမၢၼ်ႈ လႄႈ ၸုမ်းလွတ်ႈလႅဝ်း သဝ်းၶေႃၶၢင် KIO သိုပ်ႇပဵၼ်ပၢင်တိုၵ်း မီးလွင်ႈၶဵင်ႈၶႅင်ၵၼ် ႁၢဝ်ႉႁႅင်းယူႇသေ တပ်ႉသိုၵ်းမၢၼ်ႈၵေႃႈ သိုပ်ႇၽိူမ်ႉႁႅင်းသိုၵ်း လေႃႇတိုၵ်း ၸူးၼႂ်းမိူင်းၶၢင် ယူႇၵူႈမိုဝ်ႉၵူႈဝၼ်း လႆႈႁူႉၸွမ်းဝႃႈၼႆ။ ၶေႃႈမုၼ်းတီႈ www.kachinnews.com