မိူဝ်ႈၼႆႉ ၶၢဝ်းယၢမ်းၵၢင်ၼႂ် လႆႈႁူႉမႃးဝႃႈ ၽၢႆႇတူဝ်တႅၼ်း ပႃႇတီႇသိူဝ်ၽိူၵ်ႇ တွၵ်ႇတိူဝ်ႇၵျေႃႇဢုင်းလႄႈ ၸၢႆးတိၼ်ဢူး ႁူမ်ႈတင်း ၵူၼ်းၼႂ်းၸုမ်း ပႃႇတီႇ (2) ၵေႃႉ၊ ၽၢႆႇမၢၼ်ႈ ပႃးၽူႈတၢင်ႇတူဝ် ၼႂ်းႁွင်ႈၵၢၼ် ဢုပ်ႇပိူင်ႇ၊ ႁွင်ႈၵၢၼ်ပၢႆးယူႇလီ၊ ႁွင်ႈၵၢၼ်ၽၢႆႇၸွပ်ႇၶၢဝ်ႇ ၸိူဝ်းၼႆႉ မႃးဢုပ်ႇၵုမ်ၵၼ်လူၺ်ႈလွင်ႈ ပၼ်ႁႃ ဢၼ်ၵိူတ်ႇၶိုၼ်ႈတီႈၼႂ်းဝၢၼ်ႈ ပိုၼ်ႉတီႈထုင်ႉမၢဝ်း ၼႆယဝ်ႉ။

တူၺ်းငဝ်းလၢႆးဢၼ် တပ်ႉသိုၵ်း လူင်ပွင်ၸိုင်ႈၶဝ် ပူၼ်ႉပႅၼ် သုၼ်ႇလႆႈၵူၼ်းတီႈ ပွတ်းထုင်ႉမၢဝ်း၊ ဝၢၼ်ႈၼွင်ၶမ်း၊ ၼွင်မႃႉတႃ၊ ၵုၼ်တႂ်ႈ ၸိူဝ်းၼႆႉ ႁၢႆႉတိူဝ်းမႃးလိူဝ်ၵဝ်ႇလႄႈ ပူႇၵႄႇဝၢၼ်ႈ၊ ၸဝ်ႉၼင်ႈၵျွင်း  (ၼွင်ၶမ်း၊ ၼွင်မႃႉတႃ၊ ၵုၼ်တႂ်ႈ) ႁူမ်ႈ ႁူဝ်ပဝ်ႈ ပႃႇတီႇသိူဝ်ၽိူၵ်ႇ တွၵ်ႉတိူဝ် ၵျေႃႇဢူင်းတင်း ၸၢႆးတိၼ်ႇဢူး ဢိၵ်ႇၽူႈတၢင်တူဝ် ၵူၼ်းဝၢၼ်ႈ ၼိုင်ႈဝၢၼ်ႈ (4) ၵေႃႈ ႁူမ်ႈၵၼ်သေ ၵႂႃႇတိူင်ႇလၢတ်ႈတီႈ လုမ်း မယၵ ၼမ်ႉၶမ်း လႆႈၶၢဝ်ႇမႃးၼင်ႇၼႆ။

ဝၢၼ်ႈမိူင်း တေလုႁၢမ်းယွၼ်ႉ တပ်ႉသိုၵ်းလူင်ပွင်ၸိုင်ႈ ၸွမ်းယႃႉၵဝ်း သွၵ်ႈတဝ်လုလႅဝ်မူတ်းၼႆ လႅင်ႇၶၢဝ်ႇ တႆးလွတ်ႈလႅဝ်း ပွင်ႇထိုင်မႃး။

မိူဝ်ႈလဵဝ် ၵူၼ်းမိူင်း ဝၢၼ်ႈၼွင်ၶမ်း ပႆႇၸၢင်ႈပွၵ်ႈၶိုၼ်းၼႂ်းဝၢၼ်ႈ ဢၼ်ပဵၼ်ဢွင်ႈၽႂ် ႁိူၼ်းမၼ်း၊ ယွၼ်ႉသိုၵ်းမၢၼ်ႈ တိုၵ်ႉၸွမ်း ႁဵတ်းႁၢႆႉပေႉၵိၼ် ၵူၼ်းမိူင်းယူႇ ၼႆယဝ်ႉ။

ဝၢႆးသေ တပ်ႉသိုၵ်းမၢၼ်ႈ လၵ်ႉၶဝ်ႈပိုတ်းယိုဝ်း တပ်ႉဢုပ်ႇပိူင်ႇ (701) တပ်ႉသိုၵ်းၸိုင်ႈတႆး (RCSS/ SSA) ယဝ်ႉ ယွၼ်ႉၵူဝ် ၵူၼ်းမိူင်း လႆႈလိူတ်ႇမႆႈၸွမ်း ပၢင်တိုၵ်းလႄႈ ၽၢႆႇတပ်ႉသိုၵ်းၸိုင်ႈတႆး လႆႈထွၼ်ပၼ်တပ်ႉတီႈ ၼွင်မႃႉ၊ ၵူၺ်းၵႃႈ သိုၵ်းမၢၼ်ႈတိုၵ်ႉ ၶႃႈႁႅမ်တၢႆ ၵူၼ်းမိူင်း၊ ႁဵတ်းႁၢႆႉၵူၼ်းမိူင်း တင်းၼမ်ၼႆ လႅင်ၶၢဝ်ႇ တႆးလွတ်ႈလႅဝ်း ဢၼ်မီးယူႇၼႂ်း ပိုၼ်ႉတီႈ ပၢင်တိုၵ်းၼၼ်ႉ ပွင်ႇမႃး။